ប្តី ទុកកន្លែងលក់ទាអាំងចោល បែរជា ចូល ខារ៉ាអូខេ លុះប្រពន្ធតេស្តីឱ្យ ផ្ទុះកំហឹងផ្អើល ប៉ុស្តិ៍ នគរ បាលស្ទឹងមានជ័យ

រាជធានីភ្នំពេញ ៖ បុរសជាប្តីជាអ្នកលក់ទាអាំង ត្រីដុត បែរជាទៅផឹកស៊ីចូលខារ៉ាអូខេជាមិត្តភក្តិ រួចទុកកន្លែងចោល មិននៅលក់ដូរ ខឹងប្រពន្ធទូរស័ព្ទស្តីបន្ទោស លុះពេលត្រឡប់មកវិញបានវា.យសម្ភារៈលក់ដូរ និងយកធ្យូងគប់ត្រូវមុខប្រពន្ធ បណ្តាលឱ្យរយះមុខរបួសហូរឈា.ម បង្កការភ្ញាក់ផ្អើលដល់សមត្ថកិច្ចឃាត់ខ្លួនយកទៅសួរនាំ កាលពីវេលាម៉ោង១២និង៥នាទីរំលងអាធ្រាត្រឈានចូលថ្ងៃទី៣០ ខែមិនា ឆ្នាំ២០២៣ នៅចំណុចកន្លែងលក់ទាអាំង ជិតច្រកចូលប៉ុស្តិ៍នគរបាលរដ្ឋបាលស្ទឹងមានជ័យទី១ ផ្លូវ២១៧ សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ ។
តាមប្រភពព័ត៌មានពីកន្លែងកើតហេតុ បានអោយដឹងថា មុនពេលកើតហេតុ បុរសជាប្តីបានអូសរទេះមកលក់ទាអាំង ត្រីដុត និងបាយដូចសព្វដង ខណៈពេលលក់សុខៗ បុរសជាប្តីបានទៅផឹកស៊ី ចូលខារ៉ាអូខេជាមួយមិត្តភក្តិបាត់ ដោយទុកកន្លែងលក់ដូរចោល ។

តាមប្រភពដដែលបានបន្តទៀតថា បន្ទាប់មកទៀត ស្ត្រីជាប្រពន្ធដឹងរឿង បានទូរសព្ទ័ពីផ្ទះទៅបុរសជាប្តីសួរនាំ និងស្តីអោយរឿងទុកកន្លែងលក់ដូរចោល ហើយទៅផឹកស៊ីចូលខារ៉ាអូខេបាត់ ទើបស្ត្រីជាប្រពន្ធក៏បានជិះម៉ូតូមកកន្លែងលក់ ក៏អត់ឃើញបុរសជាប្តីមកកន្លែងលក់វិញទៀត ។

តាមប្រភពដដែលបានបន្តទៀតថា លុះមួយសន្ទុះក្រោយមក ក៏ស្រាប់តែបុរសជាប្តីបានជិះម៉ូតូមកដល់ ក៍ស្រាប់តែបញ្ចេញអាការៈខឹងសម្បារ ស្រែករករឿងគ្នាជាមួយនឹងស្ត្រីជាប្រពន្ធ រហូតឈានដល់ការប្រើប្រាស់ហិង្សាវា.យបំផ្លាញ របស់របរកន្លែងលក់ដូរធ្វើឱ្យខ្ទាតបាយ ខ្ទាតទាអាំង និងត្រីដុត ជ្រុះរប៉ាត់រប៉ាយពាសពេញកន្លែងកើតហេតុ និងបានយកធ្យូងគ.ប់ត្រូវមុខស្ត្រីជាប្រពន្ធ បណ្តាលឱ្យរយះហូរឈា.ម ហើយបុរសជាប្តីបានរត់គេច ចូលទៅក្នុងភូមិប្រហែល២០០ម៉ែត្រក៍ត្រូវបានបងប្អូនប្រជាពលរដ្ឋនិងកម្លាំងប្រជាការពារដេញចាប់បានយកទៅប្រគល់ឲ្យសមត្ថកិច្ចប៉ុស្តិ៍នគរបាលរដ្ឋបាលស្ទឹងមានជ័យទី១ឃាត់ខ្លួនជាបណ្តោះអាសន្នដើម្បី ធ្វើការសាកសួរផងដែរ។

ដោយឡែក ស្ត្រីជាប្រពន្ធវិញ ត្រូវបានសាច់ញាតិដឹកយកទៅព្យាបាលរបួសនៅមន្ទីរពេទ្យ រួចចាំមកធ្វើការដោះស្រាយគ្នាជាមួយនឹងបុរសជាប្តីនៅពេលក្រោយជាបន្តទៀតផងដែរ ៕